Dharma Wacana singkat dengan Judul Sasuduk Pamargin Upacara Mapandes

Om Swastyastu,

om awignamastu nama sidyam

                Suksma aturang titiang majeng ring pengenter acara antuk galah sane kapica ring sikian titiang pacang matur samatra ring galahe sane becik puniki

Para Panureksa lan Para Narawakya sane dahat kusumayang titiang

 Asapunika taler para yowana pamilet pacentokan Dharma Wacana Kabupaten tabanan warsa 2019 sane tresnasihin titiang.

               Sadurung titiang nglantur matur, lugrayang titiang ngaturang puja pangastuti pangayubagia majeng ring Ida Sang Hyang Widhi Wasa, duaning wantah sangkaning sih pasuecan ida, titiang asapunika taler ida dane sareng sami prasida rahajeng mapupul iriki kadi mangkin.

               Taler tan lali titiang nunas geng rena pengampura ring para jana sane wenten iriki riantukan sampun pastika ring sejeroning semita busana swara tumaning daging dharma wacana sane nenten manut.ring arsan titiang.antuk manah sane lascarya nunas agung pengampura nike makesami madasar antuk kawimudan titiang.

               Ida dane sareng sami sane wangiang titiang, mungguing atur titiang ring galahe sane becik puniki mamurdha “Sesuduk Pamargin Upacara Mapandes”.

               Napi mawinan titiang ngambil murdha puniki, boya ja tios santukan titiang wantah matetegar mapikeling ring ida dane, pamekas ring para yowana, indik suksman upacara Mapandes punika.

               Ida dane sareng sami, krama Baline patut nyihnayang rasa bhakti majeng ring Ida Sang Hyang Widhi Wasa, sane magenah ring khayangan jagat manut prabawanipun soang – soang masrana antuk yadnya. Ring sajeroning ngwangun yadnya, munggah ring Purana Bali, wenten kabaos Sad Kertih, inggih punika ngenenin indik pamargin pakerti yadnya, minakadi:

 Atma Kertih, Danu Kertih, Samudra Kertih, Wana Kertih, Jagat Kertih,Jana Kertih

               Selanturipun jagi aturang titiang sinalih tunggil saking bacakan Sad Kertih inggih punika indik “ Jana Kertih” sinalih tunggil upacara mapandes sane pinaka pahan saking upacara Manusa Yadnya. Upacara Manusa yadnya suksman ipun wantah swadarmaning utawi kepatutan sang mang jadma nyuciang angga premana. Marupa sinalih tunggil utsaha, mangda sajeroning kahuripanipun riwekas, mresidayang jagi ngreret indria utawi wisaye. Mecikang karma wasana sane riin miwah sane kamargiang mangkin.

               Sane patut kasuciang utawi kabersihin manut slokane sane kesinahang sajeroning silakrama minakadi,

                        Angga sarira kabersihin antuk toya

                         Pikayun kabersihin antuk kejujuran kayun

                         Premana kabersihin antuk daging sastra miwah tapa

                         Budhi kabersihin antuk kewicaksanayan

               Yening punika prasida kamargiang, sinah sang dumadi mrasidayang jagi ngeret indria, mecikang karma wasana sane riin, nguruh kehuripan sane pari purna. Napi mawinan iraga patut mersihin utawi nyuciang angga pramana iragane? Santukan kabaosang ring sajeroning sastra, kocap sang dumadi dados jadma kakuasa olih “Tri Guna Sakti” minakadi: sattwam, rajas, tamas. Selanturipun i guna rajas miwah guna tamas ngwetuang pretingkah sane nenten becik, sane kabaos “Sad Ripu”. Minakadi: Kama, Lobha, Krodha, Mada, Moha, miwah Matsarya.

               Kama setata ngulurin indria.

               Lobha setata marasa ring padewekan kirang

              Krodha setata madue kayun bendu utawi gedeg

               Mada setata nyape kadi aku

               Moha setata ngewetuang kayun bingung

               Matsarya setata madue kayun iri ati

                Punika sami merupa meseh i manusa sane dahat mawisesa. Kabaosang ring kakawin Ramayana, sekadi puniki:

               Ragadi musuh mapara

               Ring ati ye tongguania tan madoh ring awak

Teges ipun:

Wiakti wantah meseh i ragane tampek pisan ring sikian i ragene, genah ipun wantah ring ati nenten doh ring padewekan.

                Sane kabaos meseh irika wantah “Sad Ripu” sane sampun aturang titiang ring ajeng.

                Inggih ida dane sareng sami sane wangiang titiang, wantah asapunika indik sasuduk pamargin upacara mapandes, sajeroning upacara mapandes wenten tingkatan upakaran ipun minakadi wenten sane alit, wenten sane madya, taler wenten sane ageng. Kewanten suksman ipun punika pateh wantah sane matiosang uperenggan ipun.

                Sane kapuja ring sajeroning upakara mapandes Ida Sang Hyang Widhi Wasa sane maprabawa Ida sang Hyang Ananga, sane kaping kalih maprabawa Sang Hyang Semara, miwah sane kaping tiga maprabawa Sang Hyang Kama Dewa, miwah saktin ipun soang-soang. Ida kapuja kekaryanin linggih antuk bambu gading makereb mawarna kuning, taler katambehin antuk sesajen teteg katur ring Ida Sang Hyang Widyadara Widyadari.

               Sajeroning upacara mapandes lumbrah taler sekadi budaya ring Bali kairingin antuk gegitan sane marupa kidung tantri miwah malat.

               Ida dane sareng sami sane wangiang titiang, yening cutetang titiang, dharma wacana i wawu inggih punika:

               Upacara mapandes punika wantah sinalih tunggil upacara manusa yadnya sane ngeranjing ring upacara Jana Kertih pinaka pahan saking bacakan Sad Kertih

               Tetujon upacara mapandes punika wantah ngetepin I Tri Guna Sakti miwah Sad Ripu sane nguwaseyang I Manusa, kecihnayang antuk ngikir untune nenem sane magenah duuran, punika pinaka pertiwimba  I  Manusa jagi ngetep Sad Ripu.

                Inggih ida dane sareng sami sane wangiang titiang, wantah kadi asapunika prasida antuk titiang matur – atur  ring rahinane mangkin, mogi ja wenten pikenoh ipun manawi tan wenten atur titiang sane nenten munggah ring arsa titiang nunas geng rena sinampura,  sakadi slokane tan hana wong sweta analus, nenten wenten jadma sane patut. Maka wasananing atur puputang titiang antuk ngaturang parama shanti.

Om Shantih Shantih Shantih Om.

Madepancoco

Saya sangat suka dengan humor.

Bagikan Artikel ini